زبالة من موظفين ومسئولين فاسدين ومرتشين لازملهم مقشة تكنسهم.
زبالة من مديرين متخلفين رجعيين عبيد للسلطة الأهم عندهم المحافظة على كراسيهم حتى لو ده جه على حساب بلدنا وتقدمها ودول عايزين فنيك شديد التركيز لتنضيفهم.
زبالة من الأخلاق الخربانة من الكل عايزين ليها ماية نار.
زبالة من القمامة قدام شققنا وفي شوارعنا وميادينا ماليه حياتنا لازمها محليات عندها ذمة ترفعها لكن للأسف مفيش.
إحنا أكتر شعب بننتج زبالة ﻷننا أكتر شعب مستهلك في العالم وأعتقد إن القمامة بصفة خاصة فيه دول كتير بتستثمر فيها وبتعمل منها فلوس كتير،طب ليه مسمعناش عن مستثمر يجي يستثمر فلوسه في الزبالة المصرية،مع إنها متنوعة وخصبة بالكنوز،طبعا أنا بقول مستثمر يعمل مصانع للإستفادة مش شركات أجنبيه تيجي تعمل تعاقدات بملايين الجنيهات سنويا وفي الآخر متشلش حاجه ونجيب شركات مصرية هى اللي تحاول تقوم بالمهمة وبرضه تفشل.
صدقوني لو كانوا عملوا وزارة للزبالة يمسكها وزير فاهم فيها واخترعولها قانون يسمى بقانون الزبالة المصرية كنا هنحل المشكلة وكانت بلدنا كسبت كتير من تنضيفها،على الأقل ياسيدي كانت الوزارة دي ساهمت بشكل فاعل وهام في إنجاز خطة الدولة للقضاء على فيروس سي وأمراض الكبد اللي إحنا الأول في العالم فيها ولو على المصاريف الإدارية للوزارة فهى مش هتكلف الموازنة العامة للدولة ولا مليم ﻷننا من عشرات السنين بندفع إتاوة ال3 جنيه بتوع الزبالة على فاتورة الكهربا من غير ما يشيلوا الزبالة ولو على الموظفين للوزارة الجديدة فالزبالين كتير،نعمل زي إيطاليا ونحط مادة في قانون الزبالة الجديد يقول إن أي مسئول يتم ضبطه بيسرق البلد دي أو مدير فاسد أو واحد أخلاقه زبالة يشتغل في وزارة الزبالة لمدة 3 أعوام ككناس ينضف الشوارع من أمثاله كعقوبة زي موضوع الخدمة المدنية كده بدون مقابل وبكده هيكون عندنا ملايين الكناسين اللي هيشتغلوا بدون أجر.
أرجوا أن تلتفت الحكومة لمقترحي ﻷن البلد دي بجد محتاجه وزير للزبالة بس بشرط يكون عنده ذمه وبيحب النضافة وعنده خبره في التنضيف مدة لا تقل عن 10 سنين.
أخيرا سكان الكومباوندات والفلل والسرايات والتجمع الخامس يمتنعون عن قراءة البوست أو التعليق عليه ﻷنهم مش هيفهموا اللي أنا بقوله وشكرا
وفقي فكري
ليست هناك تعليقات:
إرسال تعليق