سمك لبن تمر هندي

بلدنا سمك لبن تمر هندي ولذلك الشعب كله عنده إسهال واستهبال ثم اسبهلال وكل مايمكن أن يفعله شعب في هذه الوضعية هو السمع والطاعة لأنه مش عارف ولو عرف هيعمل نفسه مش عارف لأن المعرفة هتشغل المخ والمخ عايز كهربا والكهربا قاطعه ولو جت لازم تقطعها بنفسك عن نفسك علشان الفاتورة والمخ النضيف خسارة يفكر الأحسن يروح ياكل كبده ومخ من عند الراجل بتاع سندوتشات المخ علشان بيقولوا إن أكل المخ بيزود الذكاء وبما إننا بلد فيها أذكياء كتار وشطار أكتر فالسرقة في بلدي على الكيف وعلى الأقفا كمان وكل ما واحد يقولك شاطر إعرف إنه حرامي وعايز يشغلك معاه علشان شاطر في اللغة ليها معنى تاني خالص ولو سألته بتقول عليا شاطر ليه هيقولك علشان شايفك فهلوي وبلدنا برضه على آخرها من الفهلوية وياريت بعد ما تاكل السمك ثم اللبن وبعديه تحبس بالتمر الهندي ياريت متحاولش تروح المستشفى تعمل غسيل معدة لأن الموت أرحم من إنك تدخل أي مستشفى في بلدي وفي كل الأحوال كفاية واحد يقولك إنك كويس أكيد هتصدقه وتحس بالراحة وقتي لأننا بنحب أوي اللي يقول كلام يريحنا ويضحك علينا حتى لو تعبانين ولو تعبان من أكل الخلطبيطة بالصلصة دي بلاش تروح تتعلم في أي مدرسة يحسن البلطجية اللي في الفصول يعلموا عليك خد دروس خصوصية أحسن في البيت وفي الأخر اقعد على القهوى اشرب شاي بالياسمين وريح بالك منعول أبو التفكير والهم والأرف خلينا ياعم عايشين إحنا هنوجع دماغنا ليه يعني إحنا اللي هنصلح البلد هى خربانه لوحدها وزي ما أبوشفطورة قال مفيش فايدة يعني مفيش فايدة خلينا ياعم ماشيين جوه الحيطة بيقولوا بتوصل أسرع من المترو اللي بقت أعطاله كتيرة اليومين دول على الأقل الحيطة طريق طوالي مضمون مفيهوش مطبات ولا حوادت دومتم لمصر يا رجالتها وربنا أبداً مايحرمنا منكم ومن التمر الهندي .
وفقي فكري