طه حسين والعقاد والرافعي ونجيب محفوظ دول مثال من العلماء والأدباء وعندنا كمان أحمد عرابي ومصطفى كامل وزعيم الأمه سعد زغلول ومصطفى أمين وعلي أمين ورائدة المرأه صفية زغلول دول مثال من الزعماء والقادة ، كل دول اتربوا على ضوء اللمبه الجاز والغني منهم شوية كمل مشوار العلم وتحصيله على ضوء الشموع وأنا ملاحظ إن من يوم ما الكهربا نورت مصر والرفاهية زادت والعيال انشغلوا بالتلفزيون وألعاب الفيديو جيم والكمبيوتر والإنترنت ومصر معدش فيها علماء جهابذه زي أيام زمان ولولا إن الكهرباء قطعت اليومين دول مكوناش فوقنا من السكينه اللي سارقانا دي وانتبهنا إن مصر عايزه علماء بس الحمد لله الحكومة الله يباركلها واخده بالها كويس وحانت ثورة التصحيح ، الثورة اللي هنرجع فيها عصر الظلام لمصر علشان نرجع نشغل معمل تفريخ العلماء من جديد ونطلع من تاني علماء بجد ، يعني ياجماعة موضوع قطع الكهرباء ده مقصود ومدروس كمان ، أمال إنتوا فاهمين أيه ، هى حكومة قاعدة تشد سكينة الكهربا وخلاص ، لأ وحياة والدك دي واعية وفاهمة هى بتحط رجلها فين بس مش عايزه تقول علشان الحسد والمتربصين بمعمل تفريخ العلماء وانتوا عارفين المولوتوف والقنابل البدائية ممكن تعمل أيه ، إحنا بس كشعب عيبنا إننا على طول متصربعين والحكومة مش لازم تقعد كل شوية تفهمنا مصلحتنا فين ، وإن شاء الله منتظرين أول فرخ عالم من المعمل بعد مايخلص فصل الصيف علشان تصدقونا وساعتها هتقولوا تسلم أيدين اللي شد السكينة .
#افتكاسات_كهربائية
وفقي فكري
ليست هناك تعليقات:
إرسال تعليق