في زمن السيكي ميكي اللي بيروح زي اللي بيجي واللي فات مات وإحنا ولاد النهاردة وبكره منفكرش فيه علشان التفكير في المستقبل من الغيبيات ونتعب نفسنا ليه طالما مش عارفين هنعيش بكره ولا هنموت وأحلى حاجه إنك تنام على أمل إنك تصحى الصبح تروح شغلك وياسلام لو الواحد يريح يوم كده من الصحيان بدري ويقضيها نوم لحد الضهر ويصحى يلاقي مراته محضراله الفطار المتين مع كوباية شاي مظبوطة وفي الصيف ده مفيش مانع نلاقي شقة بطيخ ساقعة تطري على القلب وبلاش ياعم توجع دماغك وتفتح التليفزيون على السياسة ومين مات ومين عاش ومين مظلوم ومين ظالم هاتلنا فيلم عربي قديم نستمتع بالكوميديا اللي فيه أو يكون فيه لقطة في شوارع القاهرة زمان ونقول للي جنبنا يااااه شايفين الحياة كانت حلوة إزاي أيام زمان يارتني كنت عايش في الوقت ده كان هيكون كل همي تلميع الجزمة وتظبيط زر الطربوش ومسك المنشة في الصيف علشان أبعد عن وشيي الدبان وأخد بالي وأنا نازل للشعل إني أحط في شنطتني الأنتيكه نص الكم بتاع الوظيفة والمنديل القماش اللي يحمي ياقة القميص الأبيض من العرق يااااه والله زمان ياجدعان بس حاول بقى متشغلش التكييف حتى لو الجو حر افتح ياعم البلكونة أو الشباك واتحمل شوية بلدك في أمس الحاجة لتوفير الكهربا ولو مش عندك تكييف وفقير وعلى أد حالك مفيش مانع تشغل مروحة السقف على أقل درجة أهو منها تلطف الجو شوية وكمان أهي أرحم من التكييف ولو هتقولي والله معنديش حتى مروحة سقف بسيطة هات ورقة كرتون متينة واعملها منشة ونش بيها على وشك وأهو كلها ساعتين والجو يهدى والليل يدخل والجو يبقى عال العال ولا أقولك أحسن بلاش تأجز إنت أحسن تصحى بدري تروح شغلك وأهو هناك هتلاقي التكييف ببلاش وعلى حساب الحكومة ربنا يخللنا الحكومة يارب بتتعب معانا برضه بس بقى لما تروح شغلك أوعى تطبق ولا أي حاجه من اللي قولتلك تعملها في بيتك يعني براحتك بقى يابرنس شغل التكييف على أسقع درجة ونور النور بتاع المكان كله يعني هو كان مال أبونا ولما توصل الشغل ابقى كلم المدام وتوصيها متشغلش التكييف ولا المروحة علشان الفاتورة بتاعة الكهربا جت الشهر اللي فات عالية أوي وصحيح هو أنت يعني هتجيب منين يعني هى الوظيفة بتديك أيه دول كلهم كام ملطوش ميكفوش يأكلوك عيش حاف أي نعم إنت بتاكل يوم سمك ويوم فراخ ويوم لحمة ويوم بتخليه فري يعني أكله مجاني بتقضيها سندوتشات من الراجل بتاع الكبدة اللي على ناصية شارعكم بس معلش اتحمل شوية علشان بلدك وبرضة فرصة تريح مراتك يوم من الطبيخ وأهو تبقى خدمة تتحسبلك عند الست المدام تنفعك ساعة الزنقة ولو كنت فعلاً من معدومي الدخل وبتقبض من الوظيفة كام قرش يادوبك يركبوك الميكروباص كل يوم مفيش مانع تفتح درج مكتبك علشان تكمل مصاريف العيال يعني هتعمل أيه يعني وأهو الضرورات تبيح المحظورات بس إوعى شغلك يلهيك عن صلاة الضهر وبعد الصلاة بلاش بقى توجع دماغك وترجع تفتح ملفات وتبدأ تكمل الشغل اللي في إيديك دي كلها نص ساعة وهتقوم تروح على ماهتفتح الملف فيهم هتكون النص ساعة خلصت الأحسن إنك تفتكر في الوقت ده الطلبات اللي المدام قالتلك تجبها معاك وانت راجع وأهو الحمد لله اتعشت النهاردة الدرج لملك يجي 20 جنيه أهم هيغطوا ميزانية طلبات البيت النهاردة وبكرة تتعوض بس متجبش حاجة من السوق اللي جنب الشغل علشان البياعين اللي فيه حرامية ومش بيتقوا ربنا في البيع والشرا وعارفين إنك موظف وفاكرين ياما هنا ياما هناك وانت ياحول الله زي مابيقولوا الصيت ولا الغنا ابقى هات طلباتك من السوق اللي بعد المزلقان البياعين هناك أي نعم مفيش عندهم زمة أوي في الميزان بس أهوم بيسبوك تنقي على كيفك حاجة حلوة وبعدين وانت ماشي لو لقيت مظاهرة للعيال بتوع البنطلونات الساقطة دول أوعى تقف معاهم علشان دول عيال مترفهين أهم حاجة عندهم يرددوا شعارات ولا فاهمين أيه أصلاً معناها بس لو لقيت تلفزيون ولا حاجة بيصور مع الناس هناك إتثائل عليهم وخش قولك كلمتين حلوين في حق الحكومة أهو برضة تبقى طلعت في التلفزيون وعيالك يشوفوك ويفرحوا بيك ولو حد اتعصب عليك من العيال بتوع المظاهرات دول قول عليهم عملاء ومأجورين وأهم حاجة متتأخرش على المدام علشان متسمعش كلمتين ملهومش أي لزمه ولما تروح ريحلك شوية كده مدد فيهم رجليك علشان تلحق تنزل شوية على القهوة على ما المدام تحضر الأكل وأهي فرصة تشوف حبايبك الأستاذ عبدالمعين سواق المكيروباص جارك وحبيبك المعلم ابراهيم اللي فاتح ورشة ميكانيكي قدام القهوة وفك نفسك بكلمتين معاهم ياجدع وخصوصاً مع ابراهيم الميكانيكي ماهو كل يوم بتقولوا نفس الكلام من عينة البلد خربت الله يرحم أيام زمان والحكومة ضيعتنا الله يخرب بيتها أهم حاجة عندها مصلحة الكبار وسيبانا إحنا ناكل طين بس إوعى تنسى تقولهم إنك اتصورت في التلفزيون ويمكن تطلع في التقرير اللي هتجيبه لميس الحديدي في البرنامج بتاع النهاردة بالليل وخدلك كوباية شاي سكر زيادة وشدلك نفسين شيشة مع دورين طاولة وقوم في السريع أجري على البيت يحسن أم العيال تستعوئك وتلاقيك جعان إتعشى ونام علشان بكرة يوم جديد وجسمك محتاج راحة مش كده ولا أيه تصبح على خير يا باشا ونشوفك كل يوم هنا معانا في مصر أم الدنيا .
وفقي فكري
ليست هناك تعليقات:
إرسال تعليق