لما قولنا إننا زعلانين إن المشير نازل إنتخابات الرئاسة علشان وعد إنه
ميترشحش واترشح لأن موقفه فيه حساسية على إعتبار إنه عزل مرسي أبو شرعية ، رديتوا
وقولتوا لينا إن المشير فعلاً مكنش ناوي يترشح ولكنه استجاب للشعب المصري لما
استدعاه وكان لازم يلبي النداء ، لأنه على رأي السيسي مفيش حد الشعب يطلبه ويرفض .
طب سؤال محيرني شوية ، طالما المشير الشعب هو اللي عايزه واستدعاه لدرجة
إنه لولا الملامة كان الشعب لم توكيلات من بعضه وحط السيسي على الكرسي بدون
انتخابات ولا يحزنون ، طب ليه سيادة المشير طالع كل يوم على قناة شكل بالساعات
بيعرض برنامجه الإنتخابي وبيستعرض مع المذيعين اللي ناوي يعمله وحملته نازله لف في
المحافظات وتاعبه نفسها ، وهل لو كان المشير بقى رئيس بدون انتخابات كان هيحتاج
لوضع برنامج انتخابي طالما الشعب هيمان في حبه بدون أي شروط ، وهل هو بالطلوع على
الشاشة كل يوم عايز يوصل رسالة لحد معين ومين هو ده ، ولا هتقولوا إنه بيخاطب بعض
القلة المندسة اللي ضد ترشحه ، طب وهو يهمه في أيه أصلاً القلة دي طالما هو شايفهم
إرهابيين منشقين على القانون والشعب اللي عايزه ضدهم .
وكمان المشير بيقول إنه مش عاجبه الدعاية الزايدة عن اللزوم من بعض
المتطوعين ، طب مين المتطوعين دول اللي بيعملوا بنارات بتتكلف ملايين في أهم
مناطق في البلد وعلى الصحراوي والدائري وكوبري أكتوبر وغيرها وغيرها ، مين المتطوع
العادي اللي هيقدر يصرف كل المبالغ دي بدون مقابل وهل يكفي أن يستنكر المشير تلك
الدعاية مع تركها أم أنها مجرد شو إعلامي ، طب لو أنا بصفتي مواطن مصري معارض
للمشير طلبت دلوقتي إني أقابله وجهاً لوجه لمناقشته بصفتي أحد أفراد الجهة
المانحة للسلطات لعلي أقتنع بوجهة نظره ، هل سيقبل المشير ذلك ، وإن كان سيرفض
لقاء مواطن عادي دلوقتي بحجة إن ده فيه خطورة أمنية عليه ، طب آمال لما هيبقى رئيس هيعمل
أيه ، وأيه أهمية إني أنتخب رئيس كل اللي هيربطني بيه التلفزيون ، ولا هتقولولي
وهو إنت كنت شوفت رئيس قبل كده فين علشان تشوفه دلوقتي ، طب ياجماعة هى كل الدماء
اللي سالت على الطرق بسبب ثورة 25 يناير متستحقش إننا نقابل في الشارع رئيس راكب
عجلة ويكون بالنسبة لينا عادي ، ومش هو ده اللي عمله السيسي وقام ركب عجلة وحسسنا
إننا في أوروبا ، طب أنا عايز أقابل المشير دلوقتي وهو مجرد مرشح وبصفتي مواطن ، أنا أطلب
رسمياً مقابلة المواطن عبدالفتاح السيسي ، وأراهنكم لو عملها مع أي مواطن عادي ووافق
، نحن الشعب نريد رؤية المشير وجهاً لوجه ، وهو خايف ليه طالما الشعب اللي عايز
يشوفه بيحبه ، هل سيستجيب المشير لطلبي ؟.
وفقي فكري
ليست هناك تعليقات:
إرسال تعليق