إحنا الشعب المصري الطيب الأصيل ، شعب أقصى حلمه يملى بطنه برغيف عيش وينام
، شعب ياكل أي حاجه ويشكر ربنا على كل حاجه ، يمكن نكون بنختلف كتير ، يمكن نكون
قاسيين على بعض في أوقات كتير ، لكننا في وقت الأزمة والصعاب تلاقينا في ضهر بعض ،
الشعب المصري الأصيل اللي لما جاله عمرو بن العاص يفتح بلاده للإسلام محبش العنف وسمع
من ابن العاص يعني أيه إسلام ومسلمين ، فكر وحسم أمره ولقى إن الحياه مع الإسلام
هتكون أحلى بكتير ، وهترحمه من بطش الرومان ، فسلم مفاتيح مصر لابن العاص وقابله
بكل ترحاب ، شعب مبيحبش النكد ، شعب ابن نكته ، شعب بيحب الخير ، وهرجع وأقول شعب
طيب ، طيب لأقصى مايتخيل البشر ، لو لقيت حد بيخانق مع حد هتلاقي ألف من يصلح ، مش
مهم إنت مع مين الأهم إنك في الأخرمصري ، يمكن يكون عيبنا الخطير إننا عاطفيين زيادة
عن اللزوم ، أي حد يلعب معانا على العاطفة تلاقي دمعتنا سبقانا ، فاكرين لما مبارك
طلع وقال إني هدفن في تراب البلد دي ، نص الشعب المصري دمعته نزلت ونسي كل البلاوي
اللي عملها مبارك ونظامه وقالك إديلوه فرصه تانية ، إحنا شعب بيستحمل كتير ، بس
لما بيفيض بينا بننفجر بكل قوة في وش الظالم ، الحمد لله إننا مش زي العراق ولا
ليبيا ولا سوريا ولا حتى اليمن ، الحمد لله إننا مسلمين وأقباط بنقول إحنا مصريين
، بنقول إحنا واحد ، عيوبنا كتير ومشاكلنا كتير بس كلها ممكن تتحل في غمضة عين ،
هتتحل بإرادة الشعب ده وبقوة بصيرته وحسن تصرفه ، مش عايزين حد يفقد الأمل في
المستقبل حتى لو كنا شايفينه مظلم ، فالشعب المصري قبل كده عاش أوقات أظلم من كده
وتغلب عليها ، البلد دي بلدنا وعلشان هى بلدنا مينفعش نسيبها لحد يخّرب فيها ،
وربنا وعدنا إننا هنكون آمنين في أوطانّا وفي بيوتنا وإحنا واثقين في موعود الله ،
علشان كده عايز أقولك لما تضييق بيك يامصري قوووي قول بس يارب وهى هتفرج إن شاء
الله .
وفقي فكري
ليست هناك تعليقات:
إرسال تعليق