إحنا الشعب المصري العظيم

سنظل نكتب حتى تنكسر أقلامنا أو يسمعنا أحد

علشان إحنا الشعب المصري العظيم فإحنا :

إحنا الشعب الوحيد اللي لما يجي يعمل فرح يقفل أجدعها شارع عمومي علشان ينصب شادر ونعطل المرور ونفضل طول الليل نشغل مكبرات الصوت فشخره ويغور في داهية اللي بيذاكر واللي عيان واللي مُسن وودنه واللي عايز ينام ومش عارف والفرح يلم صيع وناس قاعده تشرب حشيش ومسكرات وبيره عيان بيان والشرطة ولا هى هنا ولا شايفه حاجه أصلاً .

إحنا الشعب الوحيد اللي المحل عندنا يبقى متر في متر وتلاقيه محتل نص الشارع العمومي والمرور يقف واللي يتكلم ياخد بالجزمة ونرجع نشتكي من الزحمة وحرقة الدم والمحليات ولا هي هنا وعامله نفسها عاميه علشان بتاخد أتاوه وتطلع تقولك أحنا بنطبق القانون .

إحنا الشعب الوحيد اللي بيأكل غنمه من مقالب الزبالة في المدن ولما يجي عيد الأضحى نروح ننقي ونشتري الخروف التمام وندبحه وناكله ونقول الله رغم إننا عارفين إنه متغذي على الزبالة .

إحنا الشعب الوحيد اللي بيدشن حملات بواقع كل دقيقة حملة وأكتر شعب بيشكل لجان للدراسة والفحص والعرض وده كله علشان نعمل مصلحة سواء بالشهره أو نطلع من وراها بقرشين .

إحنا الشعب الوحيد اللي لسه عايش على الماضي التليد وبنقول وبنفتخر إننا نملك تلت أثار العالم وكل يوم بنمسك تجار الأثار ومعاهم آلاف القطع الأثرية اللي متهربة للخارج وبنهمل في أثارنا وبندوس عليها بالجزم .

إحنا الشعب الوحيد اللي نص سكانه من الشباب ورغم كده كل حكوماتنا من العواجيز ورمينا نص الشعب في البحر وعمرنا ما فكرنا نعتمد على الشباب دول في أي حاجه .

عرفتوا ليه إحنا شعب عظيم ، لما هتبصوا بواقعية شوية هتلاقونا شعب في الحقيقة عقيم ، لأننا بقالنا كتير أوي مطلعناش فكرة جريئة وطبقناها بجد وبقينا فيها البريمو ، شعب ماشي ورا الخواجه ، أستاذ ونابغة في ضرب الأصلي وتقليد الحقيقي وبنعتبرها نصاحه .

إحنا شعب يا ساده عايش على الماضي لحد ما الماضي داب ومعدش فيه حته سليمة نعيش عليها ، اتسمرنا في مكانا وسايبين شوية عواجيز مليانين رجعية وخوف وإنهزاميه يحكمونا لحد ما بقوا زي المِش القديم اللي مليان دود ومعدش ينفع يتاكل بس بنقول عليه جبنه قديمة ولازم نحافظ عليها .

أرحمونا كفاية شعارات وكلام فارغ ، زهقنا من تكراره ، إرحمونا وارحموا أنفسكم وكفاية تخلف وتأخر عن العالم .

#ثورة_شباب

 وفقي فكري