أخي الموظف : لاتحزن فالذي يتكلم هو الكرسي

- تعالى يا سالم قولي ليه عملت التقرير كده يا بني .
- يافندم حضرتك اللي ادتني التعليمات أعمل ده.
- طب مكنش فيه اسلوب أحسن من كده كنت تعد بيه التقرير.
- حضرتك أنا لو تفتكر حاولت أشرح لحضرتك الفكرة الجديدة لإعداد التقرير وحضرتك شاورت ليا بأيديك وانت بتتكلم في التليفون وقولتي أعمل اللي قولتلك عليه ومديت أيديك واديتني تقرير قديم وقولتلي أعمل زي ده بالظبط وبسرعة.
- معقولة ، يعني أنا السبب ، أه افتكرت أنا فعلاً كنت مشغول جداً ومأخدتش بالي ، طب وزميلك غالب عمل تقريره ولا لسه ؟ .
- لأ لسه يا فندم تحب أبعته لحضرتك ؟
- أيوه ياريت تبعتهولي بسرعة واتفضل إنت ، بس قبل ما تمشي عايز أقولك إن أنا أسف لأن الخطأ كان من عندي مش بسببك .
فور خروج سالم من المكتب قام المدير برفع سماعة التليفون واتصل بالإدارة واعتذر عن التقرير الذي وبخ بسببه في الصباح وأوضح أنه السبب وأن الموظف قام بتنفيذ تعليماته بكل صدق وأمانه وأنه مستعد لأي عقاب تقدره الإدارة
خرج سالم وقال لزميلة غالب يذهب لمكتب المدير
دخل غالب على المدير وسأله عن تقريره اللي أخده في نفس الوقت مع سالم ولسه مخلصهوش
- أسف يا مدير أصل أنا إمبارح كنت عند بابا المدير العام تحت ومفضتش أخلص تقريري ولو مستعجل عليه ممكن أديه لسالم يخلصه أصل أنا حاسس بصداع .
- ياسلام يعني حضرتك علشان كنت عند السيد المدير العام معملتش التقرير ومش عايز تعمله كمان دلوقتي .
- معلش بقى يا مدير أصل بابا بيرن عليا شكله عايزني هنزله في مكتبه وهرجعلك سلام .
المدير شعر بالغضب فصرخ في وجه غالب وقاله له :
- اتفضل يا استاذ شوف شغلك وابقى روح لوالدك بعد مواعيد العمل الرسمية وبالمناسبة سيادتك متحول للتحقيق .
طبعاً الكلام ده مش حقيقي .. ده كان مجرد حلم لصاحبنا سالم المغلوب على أمره وتقريباً كان نايم من غير غطا وعلشان كده غلط وخرف في الحلم بحاجات مش حقيقية بتاتاً .
تعالوا بقى دلوقتي نشوف الموقف الحقيقي
- تعالى يا سالم بيه قولي أيه التقرير الزفت ده
- ماله يافندم؟
- ماله ؟ زي الزفت هى دي طريقة تعد بيها تقرير ، أيه مفيش مخ خالص ، اسلوب تقليدي ومفيهوش أي جديد .
- يافندم حضرتك اللي ادتني التعليمات أعمله كده .
- أنا ؟ محصلش ، إنت كمان هتخليني السبب في فشلك ، والله عال حضرتك كمان بتتهمني بأني مش فاهم في شغلي .
- حضرتك أنا لو تفتكر حاولت أشرح لحضرتك الفكرة الجديدة لإعداد التقرير وحضرتك شاورت ليا بأيديك وانت بتتكلم في التليفون وقولتي أعمل اللي قولتلك عليه ومديت أيديك واديتني تقرير قديم وقولتلي أعمل زي ده بالظبط وبسرعة.
- وكمان بتقولني كلام مقلتهوش وبتكدب كمان ، ده بدل ما تعتذر ، فعلاً بجاحه ، اتفضل يا أستاذ غير التقرير ده واكتبه تاني بسرعه ويكون في علمك مرتبك الشهر ده مخصوم منه 200 جنيه علشان تعرف ترد كويس وتعرف شغلك .
- وابعتلي الأستاذ غالب زميلك
فور خروج سالم من المكتب قام المدير برفع سماعة التليفون واتصل بالإدارة وأكد لهم أن التقرير الذي وبخ بسببه كان بسبب موظف مهمل وقد قام بمعاقبته بالخصم من راتبه وسيقوم بإعداده مره أخرى بأسلوبي وأتمنى يعجب حضراتكم .
خرج سالم وقال لزميلة غالب يروح لمكتب المدير
دخل غالب على المدير وسأله عن تقريره اللي أخده في نفس الوقت مع سالم ولسه مخلصهوش
- أسف يا مدير أصل أنا إمبارح كنت عند بابا المدير العام تحت ومفضتش أخلص تقريري ولو مستعجل عليه ممكن أديه لسالم يخلصه أصل أنا حاسس بصداع .
- وماله يا حبيبي أنا اصلاً كنت باعتلك علشان حاسك النهاردة مش في المود خالص وكنت هقولك أديه للواد الزفت اللي اسمه سالم يخلصه وهو إحنا جايبينه ليه مش علشان يشتغل ، أه بالحق يا حبيبي سيادة المدير العام أبوك عامل أيه يارب يكون بخير .
- الحمد لله يا مدير كويس ، ده حتى أنا كنت بكلمه عليك إمبارح وهو بصراحه مبسوط منك خالص وكان بيقولك متقلقش الترقية بتاعتك في دماغه بس أول لما تيجي فرصة هيخلصهالك .
- على أقل من مهله ، أه بالمناسبة يا حبيبي أنا الشهر ده مزودك 200 جنيه في مرتبك علشان كفائتك وبصراحة دي مش مجامله ولكن فعلاً لأنك كفء وتستحق كل خير ولازم نشجع الموظفين اللي زيك .
- شكراً يا عمو بس بعد إذنك أن هستأذن دلوقتي علشان عندي مشوار وبكره أنا مش جاي أصل بابا باعتني في مشوار ومش هقدر أجي .
- ولا يهمك يا حبيبي براحتك تروح وترجع بألف سلامه
أكيد طبعاً المشهد الأول هو اللي بيحصل في مصر ، لكن المشهد الثاني والعياذ بالله هو اللي بيحصل في مدغشقر ، ربنا يبعدنا عنها ، ويخلي لينا مصر أم الدنيا ومتزعلش يا سالم العيب مش فيك العيب في الكرسي اللي بيخلي كلمة المدير هى الحق المبين حتى لو كانت أي كلام تافه أو هايف ، إنت متكلمتش مع مستوى وظيفي يقدر المسئولية ويعرف يعني أيه قيادة ولكنك تحدثت مع منصب لا يهتم بشئ إلا حماية كرسيه من المطبات الهوائية .
رسالة إلى كل موظف كفء ومحترم ولكنه مقهور في وظيفته متزعلش ، العيب مش في عقلك ، العيب في إنك دخلت الوظيفة بطولك ، حاول تشوفلك مدير تتجوز بنته أو تاخد دورات في النفاق وخفة الدم ، يا إما تاخدها من قصيرها وتنتحر لأن الإنتظار لحد الحال ما يتعدل مش هيفيدك ، وإنا لله وإنا إليه راجعون ، كان يجلس على هذا الكرسي في يوما ما موظف محترم .

وفقي فكري