يكتبها : وفقي فكري
أكيد الكل شاف وتعود علي مصطلحات حكومات مصر لما تطلع وتقولنا إحنا بنشجع
علي الإستثمار وكل وزاره نلاقي وزير الإستثمار فيها طالع يلف علي الدول بيجيب
إستثمارات جديدة لمصر ويعمل مؤتمرات ولقاءات مع رجال الأعمال ، والصغير قبل الكبير
حفظ عن ظهر قلب التصريحات بتاعة الناس المهمين والمتخصصين في مصر واللي بتقول إن
من أهم أولويات الدولة والحكومة خلال الفترة المقبلة زيادة الإستثمارات الوافدة
وجذبها والمواطن العادي ياعيني عليه ولا يفهم يعني أيه استثمار ولا يحزنون لكن
اللي بيسمعه من الناس اللي فاهمه إن ده بيحسن من وضع البلد ، وأكيد المواطن
الغلبان بيفتح بقه مسبهل أمام واحد بيقوله الإستثمار ده بيضخ أموال كتيرة داخل
السوق المصري والمواطن المسبهل طبعاً هنج لما سمع الجملة دي وخصوصا كلمة بتضخ دي
وكمان كلمة السوق وبدل ما يسأل يعني أيه بتضخ ويعني أيه مفهوم السوق دماغه بتوديه
علي سوق الخضار اللي جنب بيته وبيقول أكيد ده هيخلي الأسعار أحسن ، ولأن الدولة
عامله خدها مداس للخواجات علشان يرضو يجوا يستثمروا في بلدنا فأكيد الحكومات
المصرية إعتادت إنها تقدم تسهيلات كبيرة أوي ليهم علشان تشجعهم في عمل مشروعاتهم
داخل مصر وطبعاً المستثمر المدلل بيدلع علي الحكومة وبيجي وهو قال أيه جي علشان
خاطر يخدم مصر ويروح يشاور علي أي حته أرض عايزها والدولة تعمله المرافق وتديله
الطاقة بدعم كبير يكاد تكون بتديله الطاقة ببلاش وكمان فوق كل ده وده نديله
العمالة المصرية الرخصية يتحكم فيها زي ما يحب وابسط ياعم عندنا كمان المواد الخام
أم بلاش علشان ميكونش ليك حجة وفي الأخر المستثمر يصدر شغله للخارج ولو طرح جزء من
منتجه في السوق المحلي يرفع سعره ويخليه نار واللي مش عاجبه يضرب راسه في الحيطه .
أنا عندي مثال للأساليب دي والأمثلة كتير علشان محدش يقوللي إنت بتتكلم وخلاص ، إنتوا عارفين مصانع الأسمنت
في مصر ، المصانع دي أغلبها إتباع أيام ماكان مبارك بيبيع مصر واتحولت من مصانع
مصرية لمصانع يملكها أجانب وفيه البعض الضئيل يتبع بعض رجال الأعمال المصريين
ومعدش عندنا في مصر إلا مصنع الشركة القومية للأسمنت هو الوحيد المصري ، في
الأسبوع الماضي رفع أصحاب المصانع دي سعر طن الأسمنت من 550 جنيه للطن إلي 800
جنيه للطن وكل ده حصل في خلال يجي أربع خمس أيام ، طبعاً أصحاب المصانع دي بيقولوا
إن الأسمنت سعره إرتفع علشان التكلفة رغم إن المادة الخام بيخدوها من أرضنا ببلاش
والطاقة من غاز ووقود مدعوة لدرجة أبو بلاش برضه ولما يجي أحد المهتمين ويصرخ في
وش الناس دي ويقولهم كده حرام دي تكلفة سعر الطن 220 علي المصنع يرد عليه أصحاب
المصانع ويقولوله وإنت مزعل نفسك ليه إذا كانت الحكومة أخطرناها ومعترضتش إنت اللي
هيكون قلبك علي البلد أكتر منهم .
ياناس فين الحكومة من المهزلة دي وليه سايبين شركات الأسمنت تتحكم في
العامل الغلبان من بناء ومبلط ومحارة وعشرات بل وآلاف المهن البسيطة اللي فاتحه
بيوت ملايين المصريين وأكيد هتتوقف بسبب الإرتفاع الجنوني في أسعار الأسمنت ، وليه
عاملين خدكم مداس للخواجات وبتدوهم الطاقة بسعر مدعوم أكتر من دعمها لابن البلد
نفسه وليه سايبنهم ينهبوا المواد الخام بتاعتنا ببلاش وعمالنا فوق البيعة بأسعار
رمزية وفي الأخر يبيعوا لينا خيرنا بالغالي ، فين قانون حماية التنافس وفين قانون
حماية المستهلك ، إنتي فين أصلاً ياحكومة ، هو ده الإستثمار اللي بتقولوا بيخدم
بلدنا وبيحسن وضعنا ، حرام علينا تدوا خيرنا لغيرنا ونرجع ونقول بلد خواجات صحيح .
ليست هناك تعليقات:
إرسال تعليق