بلاها لحمة

حملة بلاها لحمة حملة في الصميم تثبت أن الشعب المصري من النوع النباتي اللي ملوش في الطعام الحيواني ورغم اننا بنستهلك ملايين الأطنان من اللحوم سنوياً إلا أن إرادة الشعب المصري أقوى من أي إغراءات ممكن تعملها بقرة أو جاموسة أو حتى جمل متعلق على سيبيا في الشارع وملفوف بقطعة قماش بيضا في المناطق الراقية أو متعري وملموم عليه قطائع من الدبان في مناطقنا الشعبية اللي أنا منها.
حلو أوي إننا نلاقي مواطن في جيبه كام جنيه ودماغه بتشاوره وبتحرضه وهو معدي قدام جزار انه يشتري حتة لحمة من فخذ بقرة مغري أو كتف جاموسة مكتظ بينادي عليه وبيقوله تعالى كلني ورغم ذلك يبلع ريقه ويمشي في طريقه ويقول بلاها لحمة،هى دي الإرادة القوية يا مصريين.
طبيعي جداً اليومين دول نلاقي شباب ورجال وسيدات بيتفرجوا كتير على أفلام الرعب بتاعة آكلي لحوم البشر أو مصاصي الدماء لأن ده طبيعي في الفترة اللي كل الشعب المصري بيمر بأعراض انسحاب الإفتتان بإدمان اللحمة من الجسم والأعراض دي بيصاحبها دايماً تهيئات وخيالات واشتياق ورغبات بشرية ضعيفة ومشاهدة تلك الأفلام تعوض جزءاً من ذلك وتهون مرور تلك الفترة على الشعب.
كمان لما تلاقوا ناس كتير بتلعب لعبة الزومبز اللي هى برضه تجسيد لآكلي لحوم البشر فده عادي متخافوش برضه هى في إطار نفس الأعراض وهتلاقوا أي حاجه فيها كلمة لحمة بتطلف الجو شوية خاصة وإن أعراض انسحاب حب اللحمة من الجسم أشد من أعراض انسحاب الهيروين والكوكايين من المدمن فمتقلقوش فترة وهتعدي إن شاء الله.
شدوا حيلكوا يا رجالة تجار اللحمة بينهاروا وقريباً جداً ستجد من يطرق على بابك ويقول لك اشتري كيلو لحمة لوجه الله علشان تساعد بيه أسرة جزار غلبان،لو التهيئات دي بتجيلك من دلوقتي فده خطير لأنه يعني في علم نفس الجزارة اندماج ومحاكاه شبة حقيقية من شدة تعلقك بأكل اللحمة وفي الحالة دي أنصحك لو فيه حد قاعد جنبك جمع كل قواك واطلب منه بتحدي وإرادة انه يضربك كف على خدك اليمين علشان تفوق وبعدها وقتي هتفوق ورد للي ضربك الكف الكف كفين مجاملة ليه على انقاذك من الوهم حتى لو كانت مراتك متخافش وهتدعيلي.
يا أيها الشعب متقلقش لو الفراخ بكل أنواعها اسعارها ارتفعت وعدت الفلنكات ده طبيعي في بلدنا إنك لما تيجي تقفلها من هنا تفتحلك من هنا بس عادي نخلص من حملة بلاها لحمة وندخل في حملة بلاها فراخ هو إحنا ورانا حاجه؟
أخيراً نصيحة جاية من خلاصة تجاربي المتواضعة في الحياة لو عايزين ربنا ينجيكم من أعراض انسحاب اللحمة من جسمكم ولو عايزين تصمدوا وتكملوا في حملة بلاها لحمة عايز كل البيوت تشغل أغنية واحدة بس وتعلي صوتها لحد ما يلف كل الدنيا وهى أغنية "مدد..مدد..مدد..شدي حيلك يابلد" وربنا يعنا ويعنكم على تجاوز الأزمة ونرجع تاني زي زماااااان والسلام ختااااام.

وفقي فكري