وزارة الكهربا عندها الحق الكامل في تصريحاتها اللي خرجت على لسان المتحدث باسمها الساعة 2 الضهر واللي قال فيها إن السر وراء عدم التنوية عن أوقات إنقطاع الكهربا هو الخوف من استغلال البلطجية والحرامية ده في تنفيذ عملياتهم الإجرامية وسحقاً وتباً وكل ألفاظ الجاهلية وعلى رأسها ثكلتك أمك أيها الشعب الذي لم يخطر بباله هذا السبب المنطقي والفز للوزارة لإننا لو كنا فهمنا دماغ الوزير ماشية إزاي مكوناش استغربنا من قطع الكهربا كل يوم في ميعاد مختلف عن التاني بس أنا فوجئت وأنا قاعد بعدها بساعتين تلاته بتصريح تاني للوزير عن نفس الموضوع ، التصريح بيقول إنه الآن أصبح متاحاً للسادة المواطنين القاطنين بمدينة نصر الدخول على شبكة الإنترنت من خلال تطبيق للتليفون المحمول للإستعلام عن أوقات إنقطاع الكهربا قبل موعدها بوقت مناسب للإستعداد واتخاذ اللازم وهنا فكرت طويلاً وسألت نفسي عدة أسئلة ، هل التصريح بتاع الساعة 2 الضهر كان لقطع الكهرباء نهاراً وتصريح آخر النهار كان للمتعاملين مع الكهربا بالليل وهل الإختلاف في التصريحين للخبطة الحرامية ولا التصريح الأول للمناطق الشعبية والثاني للمناطق الراقية ،أو يمكن الوزير ليه حد قريبه أو فرند ليه عايش في مدينة نصر مثلاً ، لأ أنا عرفت ياجماعة دلوقتي أيه معنى التصريحين بعد التركيز والتفكير بعمق شوية ، التصريح الأول معمول للإذاعة على التلفزيون والراديو والجرايد ودول الحرامية ممكن يشوفوهم أو حد من حبايبهم يقولولهم عليها فيخافوا ثم ييأسوا ثم يستكينسوا -ومحدش يسألني يعني أيه يستكينسوا- وبعدين يهمدوا ويناموا بدري أما التصريح التاني فاللسادة المثقفيين علشان ميزعلوش من الوزارة وأيديهم تشتغل تلبيخ فيها ، أه ياوزارة ياخبيثه والنعمة ذكية أخر تلاتين حاجه خطة الشيطان نفسه ميعرفش يخطط ليها بس على مين ده أنا أبو الإفتكاسات أما الإخوه الحرامية فأنا بقولهم لا تيأسوا من مزاولة المهنة عسى أن يرحل سيادة الوزير قريباً وترجع الفكه تجري في اديكم من تاني.
#افتكاسات_كهربائية
وفقي فكري
ليست هناك تعليقات:
إرسال تعليق