عامل دماغ كهربا صيني

 

كنا بنسمع عن التعذيب بالكهربا أيام نظام مبارك وكنا بنقول ياساتر استر يارب ، ربنا يبعد عنا الإعتقال والتعذيب بالكهربا في المعتقلات ، وكان الواحد بيخاف يعدي من قدام القسم لياخدوه يعملوا معاه واجب كهربا تمام ولو ربنا كرمه وطلع من جوه القسم بيطلع عامل دماغ كهربا ومشحون ع الآخر لدرجة إنه ممكن ينور..

الأيام دي الواحد بصراحة بيترحم على دماغ الكهربا بتاعة مبارك وبنقول ولا يوم من أيامك يا كهربا..يااااه فاكرين يارجاله لما كان الواحد كده ينام على كهربا ويصحى على كهربا ، كانت ماليه علينا الدنيا ، منين ما تبص تلاقي نور ..

كانوا بيقولوا إننا بنصدر كهربا للخارج وإن مصر هتكون من أكبر الدول المصدره للكهربا على مستوى العالم ، يعني مصر كانت هتنور الدنيا كلها ، علشان كده الأبحاث في المجال ده كانت شغاله إختبارات على المشبوهين والمجرمين وقطًاع الطرق علشان نتأكد من جودة المنتج الكهربائي ، أومال أيه ، لازم لما نصدر كهربا نصدرها بجودة عاليه وطبقاً للمواصفات العالمية ..

دلوقتي الدولة يمكن تفكر تستورد كهربا صيني لسد العجز في الإنتاج وزيادة الإستهلاك ، أي نعم كهربا صيني حضرتك ، مستغرب ليه ، أهل الخبرة في السوق بيقولوا إنها بتبوظ بسرعة بس الخبراء أكدوا إنها أوفر من المنتج المحلي وهتسد العجز الموجود في سوق الكهربا ..

عموماً هانت كلها أيام ونرجع تاني نعمل دماغ كهربا صيني ، وأنا بقول لكم أهوه من دلوقتي مفيش حد يسمع كلام المغرضين ويسلم ودنه للشائعات ، لأنه أكيد هيطلع كلام يقولك إن الكهربا الصيني بتبوظ خلايا المخ وبتلحسه زي البانجو تمام ، " أبسولوتلي " الكلام ده عاري من الصحة خالص لأن إحنا عندنا أجهزة رقابية مش بتعدي ولا فسفوسه تضر الشعب المصري حتى النملة اللي عندها فلات فوت ولا بتعدي من تحت أيدهم ، ولا يمكن الحكومة توافق على منتج مغشوش يضر المواطنين ، م الآخر كده إستمتعوا بالكهربا الصيني ورجعوا الماضي الجميل .

مهمة البحث عن حلول جديدة لأزمة المرور

لفت إنتباهي عنوان خبر يتحدث عن سعي الحكومة شراء ثلاثة آلاف أتوبيس جديد للقاهرة الكبرى بقيمة 4.7 مليار جنيه على مدار 3 سنوات لحل مشكلة المرور بالقاهرة ، وسألت نفسي هل حل المشكلة في تسيير أتوبيسات جديدة أم في ماذا ؟.

هل طرق وشوارع العاصمة مازال فيها مكان لقدم مواطن يسير مترجلاً في الطرقات والدروب ، لكني حين أكملت قراءة بقية الخبر إرتحت كثيراً عندما وجدت أن إجتماع الحكومة الذي عقد لمناقشة تلك المشكلة ضم الأستاذ الدكتور أسامة عقيل أستاذ الطرق والمرور بجامعة عين شمس ، فهذا الرجل أعرفه جيداً وجمعتنا الصدفة حين شاهدته لأول مره وهو يشرح مخطط تطوير ميدان المؤسسة بشبرا الخيمة أمام المهندس إبراهيم محلب وقت أن كان وزيراً للإسكان وبصراحة وقتها كنت أسمع عن إسمه فقط ولم أتعرف عليه شخصياً ولكني حين استمعت إلى رؤيته وجدتها براقة ومتطورة ، وناقش مجلس الوزراء ثلاثة محاور لحل الأزمة ، أولها رفع كفاءة الطرق وثانيها زيادة عدد الجراجات والمقترح الأخير إعتمد على رفع كفاءة مترو الأنفاق .

في الحقيقة الحلول المقدمة ليست جديدة فقد سمعنا عنها في الماضي ولكني أعتقد أن آليات التطبيق وخطوات التنفيذ ستحتوي على فكر جديد خصوصاً وأن الدكتور عقيل دائماً مايفكر بشكل مختلف في المشكلات المزمنة التي تعاني منها مصر على مدار عقود طويلة وبالتأكيد هناك رؤية جديدة سيتم طرحها للتنفيذ في هذا الشأن .

المحاور الثلاثة التي تناولها إجتماع مجلس الوزراء شملت حلان تقليديان إلا في نقطة دخول الأتوبيس بدورين ذات السعة الكبيرة للخدمة ، وأعتقد أن فكرة الأتوبيسات ذات الدورين رفضت من قبل بسبب طبيعة الشوارع وضيقها وعشوائية المباني وعدم مراعاة هذه الإرتفاعات الجديدة للأتوبيسات للعبور من تحت كباري لا يزيد ارتفاعها عن أربعة أو خمسة أمتار وربما أقل من ذلك في بعض الأماكن ، حتماً هناك دراسات سابقة أعدت بشأن تلك الفكرة ، ولكني أجد الإقتراح الثالث والخاص برفع كفاءة مترو الأنفاق أصبح بالفعل مطلباً ملحاً خاصة في ضوء الضغط المتزايد من قبل مستخدمي هذا المرفق الحيوي بسبب زيادة عدد المواطنين المعتمدين عليه إعتماداً كلياً لسرعته وانخفاض تكاليفه ، وفي الفترة الأخيرة أصبح المترو يعاني بشدة من الإهمال وتهالك مرافقه وخاصة في عمليات الصيانة لشبكة الكهرباء مما يعرضه للأعطال على مراحل متباينة ومتكررة الأمر الذي يحدث أزمة كبيرة ويؤثر بشدة على حركة المرور فوق الأرض .

لذلك لابد أن تسير مقترحات التطوير والتحسين الثلاثة في اتجاه واحد ومتزامن مع ضرورة إعطاء الأولوية لرفع كفاءة المترو لأنه أصبح ضرورة ملحة لا يمكن الإستغناء عنها ولو للحظات ، وإيجاد حل جذري لمشكلة الباعة الجائلين الذين يغلقون الشوارع أمام حركة السيارات ببضائعهم لأن تلك النقطة تمثل نصف القضية تقريباً ، وإن كانت الحكومة بدأت بالفعل ، ولكن لماذا التأخر في تطبيق الأسواق المجمعة لبائعي الشوارع لنلمس المردود الإيجابي لذلك على أرض الواقع وإن كنت أرى أن الحل لأزمة المرور لن يحدث إلا بإخراج عوامل الجذب المتمركزة من داخل القاهرة وأبعادها إلى مناطق جديدة مثل تلك التي تمس مصالح الناس وتعاملاتهم الحكومية اليومية ولابد أن يتعدى طموح الحكومة إلى ما هو أكبر من وجود الرغبة لديها وتصر على ذلك مهما كان الإنتقاد الذي ستواجهه.

 يجب على الحكومة مواصلة سعيها في البحث عن حلول مبتكرة غير تقليدية في حل أزمة المرور ومشاكلها المتعددة والإستعانة بباحثين علميين أخرين على شاكلة الدكتور أسامة عقيل واستنباط خلاصة أفكارهم وأبحاثهم التي تسعى وبصدق وحب لهذا الوطن لإنتشاله من مشاكله والعبور به إلى آفاق جديدة من التقدم والنمو .

وفقي فكري

#أزمة_المرور

#مشكلة_المرور

#إجتماع_مجلس_الوزراء

من قال أن قتل المسلم جهاد؟!

لا يمكن أن نفتح آذاننا لهؤلاء الإرهابين ، كيف نستطيع أن نشاهد فيديو تقوم فيه عناصر مسلحة بقتل جنود مصريين ويمر الأمر عادي وكأننا تعودنا على ذلك ، نرى ذلك القتل وتلك الخسه والجبن من قتله مجرمين ولا تدمع أعيننا ونبكي حرقة على سفك دماء أبنائنا وإخواننا ، من قال أن جماعة بيت المقدس هم حماة للمقدس ولمقدسات المسلمين ، والله إن بيت المقدس منكم براء والدين منكم براء ، حين نرى الفيديو الذي بث ليلة الإثنين الماضي على اليوتيوب والمرتزقة يقتلون إخواننا نسمع نشيد يقول نحن أسود الله ، نحن حماه الدين ، من قال أنكم كذلك ، أنتم لستم إلا فئران تهرولون في الظلام وتعيثون في الأرض فساداً ، إن كنتم إتخذتم من بيت المقدس لكم شعاراً فالأولى أن تذهبوا وتحرروه من أيدي الصهاينة ، لقد دكت غزة على مدار أربعين يوماً ومات الآلاف ولم تحركوا ساكناً ، ءأسود على العُزَل تقتلوهم بخسة وجبن وتتركون من يدنس بيت المقدس ؟! .

والله إن ما تفعلونه وما ستفعلوه لن يزيدنا إلا إصراراً وقوة وعزيمة على مواصلة المشوار واستكمال البناء ولن تكون مصر عراق أوسوريا أوليبيا أخرى ، إنها مصر وإننا المصريين مررنا بما هو أصعب وأهول من ذلك ولم نهتز أو نتفرق ، نحن المصريين تزيدنا المحن منح وعطاءات وتكسبنا تماسك وصلابة وإصرار ، مصر كلها وقت المخاطر تتحول كلها إلى نسيج واحد ويد واحدة وجندي واحد يُفنِي من يحاربه ويهوي بالمتربصين بها وتلقيهم في غياهب المهالك ، مصر صاحبة أقدم حضارة في التاريخ لم يهزها ولن يهزها عارض وهى محفوظة بأمر الله ولن يستطيع أحد أن يفرقنا مهما اختلفنا في وجهات النظر ، نحن إن اختلفنا في الآراء لا تختلف قلوبنا ولا تتفرق سواعدنا فاختلافنا رحمة واجتماعنا فرحة ووحدتنا صلدة وأقوى من أي خطر وسنظل هكذا على الدوام نجتمع خلف قاداتنا وقت الأزمات والصعاب .

أيها القتلة الفجرة لابد أن تعلموا أن الشعب المصري لن يترككم تعيثون في الأرض فساداً وسنقضي عليكم ليكون قتلاكم في النار بإذن الله وقتلانا شهداء بأمر وموعود رب العالمين وحسبنا الله ونعم الوكيل .

وفقي فكري 

#داعش

#الجيش_المصري

#مصر 
#بيت_المقدس

معلش يامصر عليا أقساط

عيوني بتبكي علشان مش قادر أتبرع لصندوق تحيا مصر ، العين بصيرة بحال البلد ولكن الإيد قصيرة علشان مفيهاش فلوس والعملية ناشفة ع الآخر والهجوم على المواطن الغلبان من كل إتجاه وفي وقت واحد ، الكهربا غلوها والميه رفعوا سعرها ، والغاز كمان والبنزين والسولار زادوا الضعف والخضار بقى نار والمواصلات ولعت وكل حاجه حواليا بتزيد وبتعلى إلا مرتبي والواحد مكسوف يطلب من مصر زيادة في المرتب أو منحه أو علاوة أو حتى سلفه يعني وهى مصر هتجيب منين ، أنا جاتلي ورقة التبرع لصندوق تحيا مصر دورت في محفظتي لقيتها فاضية ع الآخر ، ودموعي نزلت لما لقيت نفسي أخر الشهر وعيالي عيانين عايزين يروحوا للدكتور ولو معايا أدفع الفيزيتا خايف ميكونش معايا اللي يكمل أجيب الدوا ، وكل لحظة خايف يدق علىَ بابي محصل النور أو الميه أو الغاز يطلب الفواتير المتأخره عليا ، خايف أصحى الصبح ملقيش في جيبي تمن المواصلات علشان أروح شغلي علشان أقوم بواجبي ناحية مصر ، والأيام بتجري وخايف يجي موسم دخول المدارس وأكون لسه مقبضتش الجمعية اللي داخل فيها علشان أدفع فلوس اللبس والكتب والمصاريف والكشاكيل والكراريس والأقلام ، كل يوم عايش في قلق لمقدرش أدبر اللي محتاجه بيتي وماشي جنب الحيطة وفي حالي علشان أي خطوة بره حيطتي هتكلفني مليم زيادة مش معايا.

مصر طالبه مني أساعدها وأنا عايز اللي يساعدني ، مش إحنا ولادك برضه يامصر ، مش إنتي عايشه علشانا وإحنا عايشين علشانك ؟ ، طب أدي إحنا مستحملين أهوه قطع الكهربا كل يوم ، مستحملين صراخ بنتي الرضيعة من الحر علشان مش لاقي مروحة أشغلها ورعب بنتي الأكبر شوية من الضلمة ، ومش مشكلة إننا نشرب ميه ساقعة ومش عايزين رفاهية ولا تكييف ولا حتى تلفزيون بس عايزين نعيش وفداكي التلاجة اللي موتورها باظ من كتر قطع الكهربا ولا الغسالة اللي بطلت تغسل علشان مفيش ميه ولا نور ، هنغسل على أدينا وهنشرب ميه سخنه وبلاها رفاهية ، مستحملين غلو البنزين والسولار ومش هنركب عربيات ملاكي ، هنركب مواصلات عادية بس أنا خايف وأنا راكب المواصلة أمد إيدي في جيبي علشان أدفع ملاقيش ، أنا مش لاقي فلوس أصرف بيها على بيتي يامصر ، كل حاجه حواليا بتزيد قيمتها إلا أنا ولولا إنك أمي كنت غضبت منك ومشيت لكن هيقولوا عليا ابن عاق ، فخليني قاعد ومستحمل لحد ما ربنا يفكها وربنا مبينساش حد.

بصي ياحبيبتي يامصر أنا كان نفسي أديكي بس مش قادر ، أصلي أنا معييش أديكي وبصراحة إنتي واخدة مني كل حاجه ، وأنا لو أقدر أديكي عيوني وروحي كلها متغلاش عليكي بس أكيد إنتي عارفة إن ابنك الغلبان بقى منفض من كله وفاضل جواه بس حبك ، ياريت يامصر تقبلي حبي لأن ده هو اللي معايا وسبيني أعيش فيكي على أد إستطاعتي وياريت تخلي عيالك اللي معاهم يدفعوا ليا وليهم ما احنا برضه كلنا ولادك واللي معهوش يشيل اللي مش معاه مش كده ولا أيه ؟! 

وفقي فكري

#صندوق_تحيا_مصر

مهر العروسة مولد كهربا

بدأت ابحث بجد عن مولد كهرباء علشان أشتريه بس الميزانية مش مكفية والبند ده مكنش معمول حسابه خالص وبعدين هو أنا أصلاً كنت هتوقع في يوم إني أشتري مولد كهربا ، عموماً خلاص أنا قررت ولما الواحد يقرر لازم ينفذ ، أومال أيه ، ماهو أصل الواحد زهق من القاعدة بالفانله الحمالات في البلكونة أو على سلم العمارة قدام الشقة منتظر الكهربا لما تيجي ، ده بالنهار أما بالليل أفضل ألف حوالين نفسي رايح جي في الضلمة زي الشبح لحد ما سيادة الأخ اللي شد السكينة يصحى من النوم وينورلنا حياتنا .

الحمد لله دلوقتي فيه قنوات تلفزيون بدأت تعمل مسابقات والسحب فيها على مولد كهربائي وبيني وبينه رسالة لـ0900 ، بس ياترى هجيب البنزين منين ، أنا سمعت انهم هيعملوا طابورين في محطات البنزين ، واحد للعربيات والتاني للمولدات بشرط إنك تجيب شهادة من الوحدة المحلية اللي إنت تابع ليها ماضي عليها اتنين موظفين تقول إنك من مُلاك مولدات الكهربا وهتستعمل البنزين ده لتشغيله لحد ما الحكومة تضيفه على كروت دعم الطاقة أو بطاقة التموين .

أنصح أي أب أو أم إنهم ميدقوش أوي مع عرسان بناتهم في موضوع المهر والشبكة  ، ده مش زمنه حالص ، أهم حاجه تتفقوا على مولد الكهربا اللي هيجيبه العريس لبنتك وهيكون كام كيلووات ، أومال إنتوا فاكرين الحكاية أيه ، قطع كهربا وخلاص ، لأ ده بكره الحكومة تطرح مناقصة لبيع توكيل صيانة مولدات الكهربا وأهو كله يسترزق وسلام بقى لأن الكهربا قاطعه عندي وبطارية اللاب خلصت أشوفكم لما الكهربا تيجي إن شاء الله ده إن جت ، الوداع.

وفقي فكري 

#افتكاسات_كهربائية