عامل دماغ كهربا صيني

 

كنا بنسمع عن التعذيب بالكهربا أيام نظام مبارك وكنا بنقول ياساتر استر يارب ، ربنا يبعد عنا الإعتقال والتعذيب بالكهربا في المعتقلات ، وكان الواحد بيخاف يعدي من قدام القسم لياخدوه يعملوا معاه واجب كهربا تمام ولو ربنا كرمه وطلع من جوه القسم بيطلع عامل دماغ كهربا ومشحون ع الآخر لدرجة إنه ممكن ينور..

الأيام دي الواحد بصراحة بيترحم على دماغ الكهربا بتاعة مبارك وبنقول ولا يوم من أيامك يا كهربا..يااااه فاكرين يارجاله لما كان الواحد كده ينام على كهربا ويصحى على كهربا ، كانت ماليه علينا الدنيا ، منين ما تبص تلاقي نور ..

كانوا بيقولوا إننا بنصدر كهربا للخارج وإن مصر هتكون من أكبر الدول المصدره للكهربا على مستوى العالم ، يعني مصر كانت هتنور الدنيا كلها ، علشان كده الأبحاث في المجال ده كانت شغاله إختبارات على المشبوهين والمجرمين وقطًاع الطرق علشان نتأكد من جودة المنتج الكهربائي ، أومال أيه ، لازم لما نصدر كهربا نصدرها بجودة عاليه وطبقاً للمواصفات العالمية ..

دلوقتي الدولة يمكن تفكر تستورد كهربا صيني لسد العجز في الإنتاج وزيادة الإستهلاك ، أي نعم كهربا صيني حضرتك ، مستغرب ليه ، أهل الخبرة في السوق بيقولوا إنها بتبوظ بسرعة بس الخبراء أكدوا إنها أوفر من المنتج المحلي وهتسد العجز الموجود في سوق الكهربا ..

عموماً هانت كلها أيام ونرجع تاني نعمل دماغ كهربا صيني ، وأنا بقول لكم أهوه من دلوقتي مفيش حد يسمع كلام المغرضين ويسلم ودنه للشائعات ، لأنه أكيد هيطلع كلام يقولك إن الكهربا الصيني بتبوظ خلايا المخ وبتلحسه زي البانجو تمام ، " أبسولوتلي " الكلام ده عاري من الصحة خالص لأن إحنا عندنا أجهزة رقابية مش بتعدي ولا فسفوسه تضر الشعب المصري حتى النملة اللي عندها فلات فوت ولا بتعدي من تحت أيدهم ، ولا يمكن الحكومة توافق على منتج مغشوش يضر المواطنين ، م الآخر كده إستمتعوا بالكهربا الصيني ورجعوا الماضي الجميل .