مدام مي من زمان وهى عندها ميول انحرافية،أنا حاسس بكده بقالي فترة من وقت ما كانت بتيجي الشغل وهى حاطه في بقها لبانه بتمضغها بشكل مثير للإنتباه،ورغم إنها لابسه حجاب إلا إنها بتعتبر مضغ اللبان من أشكال الحريات الشخصية اللي ميعبهاش،من كام شهر كده جاتلي وقالتلي أنا بفكر أخلع الحجاب وأسيب شعري يهفهف في الهوا كده أصل واحده صاحبتي قالتلي إن شعري مكبوت وعلشان كده بيقع،صراحة أنا أصلاً مش بالع مدام مي من بدري علشان كده كان رد فعلي اني بصتلها من فوق لتحت وقولتلها زي ماقال عادل إمام في فيلم مرجان أحمد مرجان وأنا ببتسم ابتسامه مرسومه تخفيفاً للموقف: "إنتي من فوق مأنتمه مع جماعة نور الحق أما من تحت بقى فانتي مأنتمه مع عمرو دياب" ومع كلمة عمرو دياب كانت عيني نازله بص على بنطلونها الجينز الضيق واللي مش ماشي خالص مع الحجاب اللي حطاه على راسها،ومش عارف أيه لزمته إذا كان نص شعرها نازل من تحته وقال أيه "دي قُصه لزوم المظهر اللائق" قال يعني البت لسه آنسه وبتكشف حته من شعرها للعرسان علشان ميقولوش عليها قرعه.
مدام مي مش صغيره دي عمرها بدأ يعدي الأربعين واللي أعرفه إن عندها بنت قربت تبقى طولها ورغم كده بنت الأيه شايفه نفسها ومقضياها لبس،إشي محذق وملزق وبرفانات ومكياجات،معنديش مشكلة إن الست تاخد بالها من نفسها ومظهرها وجمالها وبتجنب دايماً إني أقول رأيي الشخصي فيها خصوصاً إن أنا عندي حتة "سكسوكه" طلعالي في وشي ساعات أحلقها وساعات اسيبها وده بيخليني أخاف أعلق يحسن تقول عليا إخواني إرهابي وعايز افجرها أو سلفي رجعي عقلي مقفول،أيوه ماهي دي الموضه اليومين دول،اسهل حاجه تقول على اللي بينقدك إنه إخواني أو سلفي وده كافي إنه يوديك في زمنا ده ورا الشمس بيجي كام كيلو كده.
كالعادة ومع كل أول ساعة عمل لازم أتصفح الجرايد علشان اشوف أيه اللي بيجرى في الدنيا،على شمالي كوباية شاي سكر زيادة وبأيدي اليمين جرنان بقرأ فيه،وأنا بقرأ جت عيني على خبرين،الأول بيقول "حكم تاريخي للقضاء الإداري:حظر الإفتاء على الجهلاء والمتطرفين وغير المختصين..تجديد الخطاب الديني بالإجتهاد في الفروع وليس في الثوابت" الخبر ده خلى السوفت وير بتاعي يهنج شوية مما استدعى معاه أخد شفطة شاي ملهلبه تعيد تشغيل دماغي تاني،ثم سألت نفسي: هو القضاء الإداري ممكن يصدر حكم بشأن تنظيم الدين الإسلامي،طب إزاي إذا كان القضاء جزء من الدين مهمته الفصل بين الناس في منازعاتهم الحياتية،إيه اللي جابه بقى للدين،يعني القضاء ممكن يقولي استخدم ديني إزاي،وأنا بكلم نفسي اقتحمت خلوتي كالعادة مدام مي بلبانتها المعتادة وبرفانها النفاذ،فكرت اخد رأيها في الموضوع ده لكن تراجعت في أخر لحظة والكلمة على شفايفي وسبتها وبصيت في الخبر التاني: "شريف الشوباشي عبر صفحته على فيس بوك للنساء:(اخلعوا الحجاب).. فهذه خير وسيلة للإعراب عن رفضكن للإسلام السياسي" والله أنا ماعارف يعني ايه إسلام سياسي أصلاً وأيه الفرق بينه وبين الإسلام ككل،جايز يكون الراجل ده عايز يقول اخلعوا الحجاب للإعراب عن رفضكن للإسلام وحب يحط كلمة سياسي كده من باب التلطيف أو التخفيف وسألت نفسي هو صحيح الراجل ده واخد تمويل من اسرائيل زي مابيقولوا علشان يعمل كده؟ تمويل أيه ياعم،هو كل واحد يقول حاجه غريبة نقول عليه ممول وعميل وخاين؟ طب ليه رولا خرسا قالت تعليقاً على الخبر ده في برنامجها التلفزيوني إن 99% من المحجبات منحرفات،ياخبر معقولة يكون كل المحجبات زي مدام مي منحرفين وعندهم نزعة مكبوته لخلع الحجاب؟ طب رولا جابت الكلام ده منين؟ أنا مش عارف اي حاجه خالص أنا دماغي خلاص ضربت ولازم أكمل شرب كوباية الشاي قبل ما تبرد.
بعد الشاي..أخيراً قررت أخد الجرنال وأروح لمدام مي مكتبها واعمل فيها المفتش كرومبو واعتبرها عينة عشوائية للتأكد من الموضوع ده،وهى صراحة من ناحية العشوائية فهى تموت فيها،عشوائية عشوائية يعني، روحتلها وقولتلها أيه رأيك يامدام مي في موضوع عمل مظاهرة للنساء في ميدان التحرير علشان خلع الحجاب،قالتلي بكل عفوية وبدون تفكير: طبعاً أنا ضدها،في اللحظة دي أنا حسيت اني ظلمت مدام مي كتير وان جواها حد محترم وكويس أوي،ابتسمت وقولتلها في حماسه: ليه،ردت وقالتلي: علشان التحرش يا بيه،لو تضمنلي إنه ميكونش في الميدان تحرش أنا أول واحده هروح هناك واخلع النقاب بلا قرف الواحدة زهقت،قبل ما تكمل كلمة زهقت دي كنت أنا عند باب المكتب بقفله ورايا وأنا بكلم نفسي وبقول باندهاش وصدمه: تحرش أيه يا مدام مي بقولك مظاهرة للنساء بس،هيجيلك تحرش منين؟ واضح إنك فوق انك منحرفة كمان غبية،صوت فجأة رن في وداني وهو بيقول: لأ مش غبية يا بيه بس التحرش مش لازم يكون من الرجالة بس،فيه كمان تحرش من حريم عادي،واضح إنك إنت اللي مش عايش في الدنيا معانا،ده كان صوت مدام مي سمعتني وقامت جري وقالتلي الكلمتين دول في ودني وقفلت الباب بسرعة في وشي تاني.
عندك حق يا رولا في إن 99% من المحجبات جواهم رغبة للإنحراف وكمان العنف وقال أيه بيقولك "الحملة القومية لمحاربة العنف ضد النساء" بس لسه قدامي أمل أخير مش هقرر إلا بعده وهو إني أروح اسأل مراتي.
بعد أيام من الموضوع...
مدام مي إنتي الصح وكلنا للأسف طلعنا غلطانين في حقك..إحنا أسفين يا مي ومن غير مدام.
وفقي فكري
